Juristët: Votëbesimi i qeverisë nuk lidhet automatikisht me ndonjë ligj
Fino: Ligjin e bëj unë
Rrëzimi në parlament? “Qeveria nuk bie”
Shumë shpejt projekti i ri, do të mbështetet në variantin e vitit 1992
Tiranë – “Qeveria Fino nuk mund të rrëzohet së bashku me ligjin e zgjedhjeve”. Ky është përkthimi i ligjeve kushtetuese shqiptare, i juristëve si dhe i disa politikave mbi votëbesimin e mundshëm që kryeministri pritet të kërkojë së bashku me miratimin ose jo të ligjit të ri në parlament. “Po nuk kaluan ligjin unë nuk kam vërtet arsye të qëndroj më si kryeministër”, ka deklaruar Fino disa ditë më parë. Por kjo duket se nuk ka shqetësuar aspak liderin e PD, Tritan Shehu, i cili tha dje se miratimi ose jo i ligjit të zgjedhjeve nuk ka asnjë lidhje me votëbesimin që kryeministri kërkon të paraqesë në Kuvend.
“Ne e mbështesim plotësisht qeverinë Fino dhe i urojmë rrugë të mbarë në detyrën e saj,- ka pohuar numri 1 i demokratëve, i cili la të kuptohet se parlamenti mund të rrezojë ligjin, por jo qeverinë. Polemikat mbi natyrën e ligjit të zgjedhjeve nuk janë shuar mes palëve, ndërkohë që Fino ka deklaruar pas takimit me partitë se shumë shpejt do të kalojë projektin në qeveri e do të kërkoje miratimin e tij në parlament. “Së bashku me të do të paraqes edhe votëbesimin e kabinetit të cilin drejtoj”, ka paralajmëruar sërish kryeministri duke lënë të kuptohej se një dorëheqje nga posti do të ishte gjithmonë e mundshme.